De novo de volta...

Despois dunha longa ausencia motivada pola falta de tempo para adicarlle ao blog, estou aquí de novo con moitas cousas que contar, moitos modelos que retomar, e algúns cambios. O primeiro de todo é desculparse con todos vos por este paréntese, espero recuperar o ritmo de traballo para poder contarvos o que ando a facer e retomar os modelos e proxectos que quedaron gardados no caixón. Así e todo, estou de volta de novo.

Como é moito o que pasou durante este tempo, vou intentar racionar un pouco a información. Escribirei unhas cantas entradas independentes para contarvos  que tal foi a Google Geo users Summit de Barcelona, tamén vos falarei de algúns descubrimentos desafortunados ao meu regreso, dos cambios que decidín realizar na miña galería e dos modelos que teño entre máns, entre outras cousas.

Dito isto, so me queda poñerme mans á obra....

Alégrame estar de volta de novo :)

Saudos

Anxo

WIP. Modelo en progreso. A Catedral de Santiago de Compostela.

Ola de novo a todos. Sigo co traballo na catedral de Santiago e tal e como prometín, aquí vos traio un pequeno informe de como vai o modelado. A fachada do Obradoiro está prácticamente rematada e xa case completamente texturizada (que leva o seu tempo), a falta de algúns detalles e algunhas esculturas. Tamén comecei coa zona do claustro e os museos, onde xa está prácticamente rematado o claustro gótico e unha das duas torres que o flanquean, a Torre da Vela. Da outra torre, a do Tesouro, simplemente fixen unha aproximación volumétrica. Na fachada que da á praza do Obradoiro tamén fixen algún avance modelando os balcóns, fiestras e ventanas, pero queda moito que facer ainda. 

Como as imaxes se explican mellor do que poda facer eu, aquí deixo unhas cantas para que podades ver o estado actual por vos mesmos.

Como podedes ver, o modelo é bastante detallado, tal e como pretendía. Xa estou comezando a definir as partes nas que o vou dividir para subilo na Galería 3D. Debido ao nivel de detalle tal vez sexa necesaria algunha división máis do que pensaba ao principio, ou incluso pode ser que prescinda do interior, pero iso ireino valorando según vaia progresando. 

Non me extendo máis. Seguirei actualizando a información a medida que vaia progresando co modelado. 

Saudos ;)

Anxo

Concello de Ferrol. Modelo actualizado.... ?.

Máis ben, modelo novo, porque ainda que se trate dun modelo antigo mellorado, fíxeno todo enteiro dende 0

...

Boas a todos, a verdade é que xa tocaba, algúns modelos vanse quedando anticuados e de vez en cando está ben darlles unha volta, ou varias. A cuestión é que un dos meus modelos máis antigos, o Concello de Ferrol, xa necesitaba urxentemente de unha revisión.

O modelo do Concello de Ferrol é un dos meus modelos máis antigos (xaneiro de 2007), e foi dos primeiros que subín á Galería 3D con texturas fotográficas. Dende entón, casi que non o actualicei, polo que pouco a pouco foi quedándose bastante desfasado... e para mostra, un botón, aquí tedes un par imaxes de como lucía o modelo antes:

Uffff.... a verdade é que agora da dentera velo ao pobre... (e pensar que forma parte de varias coleccións do mellorciño da Galería 3D).  Resultaba evidente que necesitaba un cambio para estar á altura, así que me puxen mans á obra e refixen o modelo dende 0, completamente e dende o principio. Estou moi contento co resultado, incluso sin necesidade de comparalo co antigo, o aspecto final é moi satisfactorio para o meu gusto e creo que está a anos luz da versión anterior. Para que xulguedes vos mesmos déixovos unhas cantas imaxes do novo modelo e así podedes comparar ...

Como podedes ver, a diferencia é máis que notable. Aquí vos deixo tamén un par de capturas con e sin texturas onde podedes apreciar a complexidade que ten agora o modelo:

E como ven sendo habitual tamén últimamente, fixen uns cantos renderizados con Artlantis, que sempre quedan máis resultóns que as capturas de SkechUp. Nesta ocasión tamén xoguei un pouco coa iluminación nocturna, algo que non fixera ata o de agora e que resultou moito máis sinxelo do que imaxinaba... a ver que vos parecen:

Cómo o vedes?... Como xa dixen, eu estou consideráblemente satisfeito, sobre todo se o comparamos co antigo. Para rematar aquí tedes o modelo na galería 3D co seu enlace.

Enlace Galería 3D: Concello de Ferrol

E isto é todo polo de agora, espero que vos guste. Creo que vou continuar actualizando algúns modelos antigos máis, xa vos irei contando.

Saudos a todos ;)

Anxo