miércoles, 29 de agosto de 2012

SketchUp. Nova imaxe.


Despois de que Google vendese SketchUp a Trimble, algo que para moitos foi unha noticia inesperada que axitou a toda a comunidade de modeladores 3D ao longo do mundo, chegan os primeiros cambios "visibles", literalmente, porque o primeiro cambio salientable é que mudou a imaxe de SketchUp, novo logo, nova imaxe na web e no blog oficial.


Tamén temos unha nova actualización, sen mais novidade visible (en principio) que a de incluir o cambio de imaxe nos logotipos e iconos de escritorio e arquivos. Polo de agora a nova actualización (que deron en chamar M4) so está dispoñible en inglés, pero podedes descargala na páxina oficial. 

Eu non esperei... :P




Novo Modelo. Parc Esportiu Llobregat. Cornellá.



O Parc Esportiu Llobregat en Cornellá, é un complexo deportivo deseñado polo prestixioso arquitecto Álvaro Siza, sendo a súa obra máis representativa no entorno de Barcelona. O singular edificio acolle diferentes instalacións deportivas, que inclúen un polideportivo con capacidade para 2.500 espectadores, varias salas multiusos para actividades e un complexo acuático con 2 piscinas, unha exterior e outra interior climatizada.


Son moi remarcables as piscinas, que xogan, arquitectónicamente falando, co diálogo entre interior e exterior resultando unha a continuación da outra pero sen chegar a tocarse, separadas por unha fina lámina de vidro. O espacio elíptico que acolle a piscina interior é tamén moi espectacular, sen perder a limpeza e pureza de liñas que caracterizan a obra de Siza. Combina iluminación artificial e natural que entra a traves de lucernarios circulares na cúpula que cubre o recinto.

O modelo abarca a totalidade do complexo deportivo, e tamén os árbores da zona axardinada ao redor das edificacións. Debido ás novas normas para a aceptación dos modelos na capa 0 de Google Earth, os árbores foron separados do modelo principal e subidos independentemente en 2 partes.



Aquí vos deixo tamén unhas cantas capturas do modelo que incluen tamén as árbores:







E de regalo unhas cantas imaxes do modelo en Google Earth:





E isto é todo, espero que sexa do voso agrado.

Saudos ;)

Anxo

lunes, 20 de agosto de 2012

WIP. A Catedral de Santiago de Compostela. Retomando o traballo

Despois de todos estes meses sen apenas dar sinais de vida, finalmente retomei o traballo de modelado coa Catedral de Santiago, algo que levaba completamente parado desde finais de marzo.


Como podedes ver na imaxe, a principal novidade é que por fin me decidín coas escaleiras da fachada do Obradoiro, algo que por motivos absolutamente aleatorios, quedara postergado durante todo o modelado. Ainda non están rematadas e faltan pequenos detalles, como algún dos remates da intrincada forxa da verxa que pecha a escaleira ou as estatuas que se sitúan en algúns puntos, entre outras cousas. Teño que mencionar que o traballo con Photoshop para recrear as texturas da verxa levou prácticamente o 95% do tempo que invertín no modelado das mesmas.... un pequeno pesadelo, a dicir verdade, pero creo que o resultado mereceu a pena. Xulgade vos mesmos a ver que vos parece:





Aquí vos deixo tamén unhas cantas imaxes da praza do Obradoiro coas escaleiras, para que vexades que tal vai quedando todo o conxunto.



Como vedes, tamén avancei lixeiramente coas texturas do Pazo Episcopal, pero ainda queda moito traballo por facer antes de dar o modelo por rematado.

Próximamente máis (espero que sen moita demora), ;)

Saudos,

Anxo


"Y no estaba muerto, no, no,...."




Pois non, non estou morto, desaparecido si, pero vivo, san e salvo. Por moitísimos motivos que non vou relatar aquí, estiven apartado durante todos estes meses da actividade do modelado e tamen deixei un pouco abandonado á sua sorte este blog.

Os motivos desta volta son varios, o máis importante é que retomei na medida do posible o modelado 3D, e con el o traballo co modelo da Catedral de Santiago, do que publicarei algún pequeno avance nas seguintes entradas. Outro motivo é que pasaron moitas cousas durante esta "ausencia" que no seu momento eran merecedoras dalgún comentario por estos lares, como a venda de SketchUp a Trimble, algo que removeu os cimentos da comunidade de xeomodeladores en 3D de Google, e da que ainda moitos estamos en proceso de adaptación. O feito de non ter comentado nin o máis minimo o tema é unha espiniña que quería quitarme.... esa e moitas máis.


Non vou aburrir con máis explicacións. Estou de volta e, na medida do posible, intentarei darlle algo de vida ao blog. :)

Pois iso, vémonos dentro de pouco por acó, si é que seguides aí! :D


Saudos!



Anxo

miércoles, 28 de marzo de 2012

WIP. A Catedral de Santiago de Compostela. Xogando con Artlantis.

Máis vale tarde que nunca!, aquí traio os renders que prometín na anterior publicación. Son renders de proba sobre o modelo todavía sen rematar e tal e como poderedes observar, teñen moito de provisionais, tanto na edicion das texturas cono no propio modelado dos elementos e os detalles. Hai que ter en conta que o modelo está pensado para Google Earth, coas limitacións que iso require. O traballo vai encamiñado a crear 2 versións do modelo, unha máis sinxela (que non incluirá o interior) para Google Earth, e outra moito máis completa e detallada para facer renders de moita máis calidade e para outros usos e que ainda está pouco definida (as cubertas e os tellados, por exemplo, son ainda lisos e utilizan como textura a imaxe de satélite de Google). 

Dito isto, os renders que realicei están feitos sobre un "híbrido" destas 2 versións, de aí o de provisionais, pero dan unha idea de por onde van os tiros. Foron realizados con Artlantis, un programiña de renderizado de facil manexo, do que xa falei nalgunha ocasión e co que se obteñen uns resultados bastante aceptables. E xa sen máis preámbulos, aquí tedes as imaxes en cuestión, lembrade como sempre, que pinchando poderedes velas con mellor calidade.

Fachada do Obradoiro:


Claustro:




Praza de Praterías:



Torre da Berenguela:



Fachada do Obradoiro (bis):



Interior (Pórtico da Gloria e nave central):








E como propina, un contraluz do cimborrio e as cubertas da catedral co fogonazo do sol, que sempre lle da un aquel ...



E isto é todo. Como proba non está mal non?,  espero que vos gustase.... :)

Agora todavía queda bastante traballo de modelado por diante que intentarei ir levando aos poucos cando o tempo e outras ocupacións o permitan.


Saudos,


Anxo

martes, 6 de marzo de 2012

WIP. A Catedral de Santiago de Compostela. Avances co Pazo de Xelmirez e o Códice Calixtino.

Houbo bastantes avances dende a última vez que publiquei sobre o modelo da Catedral de Santiago. A parte de que o modelado avanzou pola zona do Pazo de Xelmirez e pódese dicir que o volume xeral de todo o conxunto catedralicio está prácticamente definido, comecei a facer probas de renderizado sobre as partes xa máis avanzadas que requeriron de algúns axustes e algún modelado extra e dos que falarei maís tarde. Ademáis de todo isto, incluín un pequeno "ovo de pascua" agochado nalgún punto de todo o edificio.

Pero imos por partes, nesta publicación falarei dos avances co modelado e deixarei o tema das probas de renderizado para outra. Aquí vos deixo unha imaxe que da idea dos avances do modelado pola zona do Pazo de Xelmirez e na que sa xe adivina o volume case definitivo de todo o conxunto, a falta de engadir algunha capela, a Fachada da Acibechería e os detalles finais.


Tamén probei a contextualizar un pouco máis o modelo e engadín un ceo gris, moi propio da cidade de Santiago para darlle un pouco máis de autenticidade ao modelo, como podedes ver nas seguintes imaxes extraidas tamén do SketchUp:






Ademáis de todo isto, e como comentaba antes, tomeime a licencia de recrear a escala real o desaparecido (sic) Códice Calixtino e escondelo nalgún punto do complexo catedralicio, engadindo así un pequeno aliciente e retándovos a todos a atopalo no momento no que o modelo quede publicado en Google Earth. Polo de agora so vou deixar unha imaxe, para que polo menos teñades unha idea do que hai que buscar. :)


Como xa dixen, nunha próxima publicación falarei das probas de renderizado que fixen utilizando Artlantis sobre as partes máis avanzadas do modelo e que requeriron algúns traballos extra dos que darei conta no seu momento.

Polo de agora isto é todo.

Saudos ;)

Anxo

viernes, 27 de enero de 2012

WIP. A Catedral de Santiago de Compostela. Avanzando pola Quintana



Aquí estou de novo cuns cantos avances no modelado da Catedral de Santiago. Continúo progresando pola parte posterior do complexo catedralicio, na zona do ábside e as capelas que da á Praza da Quintana. Está prácticamente rematada a capela da Virxe do Pilar, unha das máis destacadas das que se atopan na cabeceira, xusto xunto a torre da Berenguela. Como podedes ver nas seguintes imaxes, falta algunha textura, pero pódese apreciar o detalle da linterna da capela e que engadín encima do teito do ábside (detras do cimborrio) un pequeno modelo do Agnus Dei que alí se encontra :



Tamén avancei coas fachadas posteriores. A parte comprendida entra a torre da Berenguela e a capela da Virxe do Pilar que da á zona coñecida como a Praza dos Literatos, xa está rematada. Tamén está avanzada a fachada da Quintana de Mortos, onde se atopa a Porta Santa. Deixo xa a continuación as acostumadas imaxes de tal e como vai o modelado nestes momentos onde poderedes apreciar que tamén cambiei a textura das cubertas de pedra das naves da catedral, xa que na imaxe de GE non se apreciaba suficientemente a morfoloxía característica que teñen. Tamén poderedes ver a Porta Santa xa rematada.






E ata aquí por hoxe. Agora, e seguindo a orde, continuarei coa parte da Quintana de Vivos e o resto de capelas da cabeceira, incluida a Corticela. Espero que vos guste como vai quedando.

Saudos ;)


Anxo